Kooxda kubadda cagta Barcelona ayaa ka cadhootay jawaabta ay ka heleen rafcaan ay ka qaateen ganaax lagu riday weeraryahanka reer Poland ee Robert Lewandowski oo saddex ciyaarood laga mamnuucay garoomada, kaddib casaan uu qaatay ciyaartii ……… ee horyaalka Spain ee LaLiga.
Lewandowski oo kaadh casaan ah la siiyey ciyaartaas, ayaa waxa caadiyan uu fadhiyi lahaa hal kulan, balse garsooraha ciyaarta ayaa warbixintiisa ku daray falcelintii uu laacibkani ka bixiyey kaadhka casaanka ah ee la siiyey, maadaama uu sameeyey mudaharaad iyo saluug uu ka qabo heerka caddaaladda iyo tayada garsooreyaasha horyaalka LaLiga.
Barcelona ayaa rafcaan ka qaadatay ganaaxan, balse waxa la siiyey jawaab diidmo ah, taas oo keentay in madaxweynaha Barcelona ee Joan Laporta uu ku eedeeyo horyaalka LaLiga in ay u xaglinayaan Real Madrid, waxaanu tusaale u soo qaatay waraysi uu bixiyey Carlo Ancelotti kaddib ciyaartii Girona oo rikoodhe lagu dhigay uu ku tilmaamay ‘mid laga soo shaqeeyey oo aan jirin’.
Joan Laporta iyo Florentino Perez ayaa toddobaadkii hore iska diiday inay ka qayb-galaan shirweynaha LaLiga oo ka dhacayey magaalada Dubai, waxaase uu Laporta si gaar ah ugu eedeeyey LaLiga inay kooxdiisa cadaadis ku hayaan.
Waxa uu sidoo kale sheegay in ganaaxa Lewandowski uu ka dhigan yahay, in sharciyo qasab ah oo lagu dhibaataynayo naadigiisa uu ka dhigan yahay ganaaxan. Waxa kale oo uu ka dalbaday in la khafiifiyo sharciga FFP ee dhaqaale wanaagga oo uu sheegay inuu ka joojinayo Barcelona inay saxeexyo samayso bisha January.
