Kooxda kubadda cagta Barcelona ayaa doonaysa inay la saxeexato dheeman kasoo baxday kulliyadda Real Madrid ee La Fabrica laakiin ay si fudud ku lumiyeen oo hadda Xavi Hernandez uu ka dhiganayo beddelka ruug-caddaagooda khadka dhexe ee Sergio Busquets.
Barcelona ayaa raadinaysa ciyaartoygii u beddeli lahaa Sergio Busquets oo qandaraaskiisu uu ku egyahay dhamaadka xilli ciyaareedkan, balse ay wali isku dayayaan inay ku qanciyaan inuu sii joogo sannad kale.
34 jirkan ayaa hore shaki loo geliyey inuu dhamaysan doono xilli ciyaareedkan socda, waxaanay taasi walaac ku abuurtay Xavi Hernandez oo qorshihiisa degdegga ahaa uu noqday inuu Frenkie de Jong ka ciyaarsiiyo booska kubbad-burburiyaha haddii uu Busquets baxo bishan January.
Laakiin kabtan Busquets oo kusii negaanaya Camp Nou illaa dhamaadka xilli ciyaareedka ayaa waxa uu kooxdiisa fursad u siinayaa inay la saxeexdaan ciyaartoy isku-darsaday kubbd-dhisid iyo difaacis, waxaanay ka adeegan doonaan suuqa xagaaga.
Tiro ciyaartooyo ah ayaa lala xidhiidhinayaa Barcelona, waxaana ka mid ah laacibka reer Portugal ee Ruben Neves iyo kubbad-burburiyaha reer Spain ee Zubimendi, hase yeeshee waxa hadda diiraddooda soo galay laacibka khadka dhexe uga ciyaara Villarreal ee Dani Prajo.
Sida uu kusoo warramayo wariyaha ciyaaraha ee Gerard Romero, Dani Parejo oo kasoo baxay kulliyadda da’yarta Real Madrid balse ay si fudud iskaga direen markii ay boos ka siin waayeen kooxda koowaad, ayay Barcelonaa doonaysaa inay la saxeexato, iyadoo qiimihiisana lagu sheegay €7 milyan oo Euro.
Heshiiska uu laacibkani kula jiro Villarreal ayaa ku eg sannadka 2024, waxaanay ku qabsan yihiin inay iibiyaan xagaaga si aanu qaab xor ah ugaga tegin sannad kaddib.
Xilli ciyaareedkan socda ayuu u saftay kooxdiisa 27 ciyaarood oo dhamaan tartamada ah, waxaanu caawiyey shan gool, halka Sergio Busquets uu kaliya hal caawin sameeyey 21 kulan oo uu u dheelay Barcelona.
