Kooxda kubadda cagta Barcelona ayaa ka naxsan wararka kasoo baxaya mustaqbalka xiddiga khadka dhexe uga ciyaara Chelsea ee N’Golo Kante oo ay qorshaynayeen inay si xor ah kula wareegaan xagaaga foodda inagu soo haya oo uu ku egyahay qandaraaska uu Kante kula jiro Blues.
31 jirkan ayaa la sheegay inay Barcelona wada-hadallo kula jirtay isla markaana ku dhoweyd inay heshiis hordhac ah lasii gaadho bisha January kaddib markii uu iska diiday inuu ogolaado qandaraas laba sannadood ah oo ay Chelsea u bandhigtay.
Laacibkan oo 18kii bilood ee ugu dambeeyey la dhibaatoonayay dhaawacyo ayaan qayb ka noqon xiddigaha Faransiiska ee Koobkii Adduunka ee 2022 oo uu dhaawac ku seegay, waxaana Jimcihii uu tababare Graham Potter xaqiijiyey in uu illaa bisha February u jiifi doono dhaawacaas.
Sida lagu sheegay xog uu helay wargeyska Foot Mercato, N’Golo Kante ayaa dalab lacag badan xambaarsan ka helay kooxda reer Sucuudi Carabiya ee Al Nassr oo sidoo kalena la saxeexanaysa xiddiga Portugal ee Cristiano Ronaldo.
Al Nassr ayaa la sheegay inay mushahar waalli ah u ballan-qaadayso N’Golo Kante oo uu noqon doono laacibka labaad ee u dhacaya qasnadda Sucuudiga kaddib Cristiano Ronaldo, hase yeeshee waxa dhinaca kale ay Barcelona ku dedaalaysaa in ay ku qanciso laacibkan in aanu gaadhin waqtigii uu tegi lahaa Sucuudiga oo heerka kubaddiisu aad u hoosayso.
Si kastaba ha ahaatee, Barcelona ayaa wadnaha farta ku haysa, waxaanay ka baqayaan in lacag loogu awood sheegto oo laga hor-qaado xiddiga ay u arkaan inuu yahay beddelka Sergio Busquets oo si xor ah uga tegaya dhamaadka xilli ciyaareedkan.
