Tartankii loogu jiray mucjisada da’da yar ee reer Brazil ee Endrick ayaa waji kale yeeshay, waxaana si toos ah dagaalka usoo galay tababare Xavi Hernandez oo telefoonka kula xidhiidhay xiddigan iyo waalidkii, si uu ugu qanciyo inay yimaaddaan Barcelona oo uu u sharraxay qorshaha ciyaareed iyo fursadaha uu doonayo inuu siiyo.
Endrick oo ay da’diisu tahay 16 jir, isla markaana weerarka uga ciyaara Palmeiras ayaa bishii October saftay ciyaartiisii koowaad ee kooxda koowaad, waxaanu markiiba isku qoray taariikhda naadigaas oo uu ka noqday laacibkii ugu da’da yaraa ee gool u dhaliya.
Kooxo badan oo Yurub ah ayaa doonaya laacibkan, waxaana horraantii bishan dalab £40 milyan oo Gini ah ka gudbisay PSG oo laga diiday, waxaase illaa hadda socda dedaallo ay kooxaha waaweyn ee Yurub ku kala jiidanayaan.
Tababare Xavi Hernandez oo waraysi siiyey warbaahinta ESPN ayaa shaaciyey inuu la hadlay Endrick, waalidkiisa iyo kooxdiisa Palmeiras intaba, si uu ugu qanciyo inuu da’yarkani yimaaddo Camp Nou, waxaanu yidhi: “Waxa aanu wada-hadalnay aabbaha dhalay Endrick. Waxa kale oo aan si toos ah ula hadlay ciyaartoyga, waxaanan u sharraxay mashruuca Barcelona.
“Waxa aanu doonaynaa ciyaartoyda hibada leh, isaguna waa laacib hibo badan oo awood u leh inuu isbeddel sameeyo. Waxa uu leeyahay dhamaystir wanaagsan, goysmo iyo awood uu u leeyahay inuu garoonka isbeddel ka sameeyo. Mar horeba waxa uu noqday ciyaartoy lagtu xisaabtamayo, waxa uu ka dheelayaa horyaalka Brazil, sidoo kalena waa ciyaartoy mustaqbalka ah.”
Barcelona oo haysata ciyaartooyo badan oo da’yar ah oo kooxda koowaad boosas joogto ah ka helay, sida Pedri, Gavi, Balde iyo kuwo kale, waxay sidoo kale doonaysaa inay hesho Endrick.
Dhinaca kale, kooxda kubadda cagta Real Madrid ayaa la sheegay in maalmihii ugu dambeeyey ayay dedaal badan ku bixinaysay sidii ay Endrick ugu qancin lahayd inuu yimaaddo Santiago Bernabeu oo uu ka garab ciyaaro Vinicius Junior iyo Rodrygo Goes, hase yeeshee kooxo kale oo ay ka mid yihiin PSG iyo Chelsea ayaa iyaguna ku dagaallamaya.
Endrick oo ka ciyaara weerarka ayaa kooxda da’yarta ee Palmeiras u dhaliyey 165 gool kaliya 169 ciyaarood oo uu u saftay, waxaana kooxda koowaad markii loosoo dallacsiiyey uu afar ciyaarood gudahood ugu dhaliyey shan gool.
