Erling Haaland ayaa xalay laba gool ka dhaliyay kooxda Leeds United oo ay 3-1 kaga soo guuleysteen xilli uu noqday ciyaartoygii ugu dhakhsaha badnaa ee 20 gool Premier League gaadha abid.
Kulanka kaddib ayuu Erling ka hadlay wax badan sida kooxda hoggaanka shanta dhibcood kaga haysa ee Arsenal oo ay caydhsanayaan.
Sidoo kale waxa uu sheegay wixii uu qaban jiray intii Koobka aduunka ee uu ka maqnaa xulkiisa Norway socday iyo sida uu uga cadhooday waxyaabaha qaar ka dhacay.
Haaland ayaa ugu horreynba sheegay inuu aad goolal ugu gaajaysan yahay isla markaana ay ahayd inuu ugu yaraan shan gool ka dhaliyo kulankii Leeds ee xalay.
Arsenal ayuu sheegay inay tahay kooxda ay ugaadhsanayaan halka uu xusay inuu gurigiisa kulamada ku daadihin jiray walow aysan cidina dhagaysan jirin intii Koobka aduunku socday.
22 sano jirkaas ayaa waxa ka cadhaysiiyay ku tilmaamay inuu Koobka aduunka ku daawanayay dad goolal dhalinaya oo kaddib guulaysanaya.
22 sano jirkaas oo Amazon Prime la hadlayay ayaa yidhi “Asxaabtayda waxaan u sheegay inaan shan gool dhalin karayay taasina waa xaqiiqada. Guushaasi ayaa ah waxa ugu muhiimsan, Arsenal ayaa hoggaanka haysa waana inaanu ugaadhsanaa”.
“Waxaan fadhiyay fadhiga gurigayga anigoo waxyar ka cadhaysan in aanan Koobka aduunka ciyaarayn, gurigayga ayaan daadihiyaha kulanka ka ahaa balse cidna ima dhagaysanayn”.
“Dib ayaan isku soo xoojiyay inaan arkay dad kale oo goolal ka dhalinaya kulamana guuleysanaya koobka aduunka way i dhiirigelisay wayna iga cadhaysiisay, aad ayaan u gaajaysanahay”.
