Kooxda kubadda cagta Arsenal ayaa niyad-samaan fiican ka qabta in bisha January ay la saxeexan doonto weeraryahanka Barcelona sannadkiisii koowaad ugu buuxsamayo ee Ferran Torres, kaas oo uu tababare Mikel Arteta doonayo inuu dib ugu soo celiyo horyaalka Premier League.
Xiddiga reer Spain ayay Barcelona 55 milyan oo Euro kaga soo iibsatay Manchester City bishii January ee horraantii sannadkan, waxaase uu u dhacay kaydka kooxda iyadoo laga doorbiday Robert Lewandowski, Raphinha iyo xataa Ansu Fati, halka dhinaca kalena ay u xidhan tahay Ousmane Dembele.
Lix kulan oo kaliya oo horyaalka ah iyo hal kulan oo Champions League ah ayuu Ferran Torres u saftay Barcelona xilli ciyaareedkan, halka fasalkii horena uu 18 ciyaarood oo uu dheelay uu u dhaliyey shan gool, taas oo aad uga hoosaysa waxa uu Xavi Hernandez ka doonayo ciyaartoydiisa afka hore.
Sida uu sheegay wariyaha ciyaaraha ee Dean Jones, tababaraha Arsenal ee Mikel Arteta ayaa doonaya inuu la saxeexdo Ferran Torres si uu u hoggaamiyo afka hore ee weerarka kooxdiisa kaddib dhaawacii sababay qalliinka ee soo gaadhay Gabriel Jesus oo muddo saddex bilood ah garoomada ka maqnaan doona.
Torres ayaa uu Arteta u arkaa xalka ugu habboon ee dhibaatada afka hore ee kooxdiisa maadaama uu hore uga soo dheelay horyaalka Premier League oo 43 ciyaarood oo uu u saftay Man City uu u dhaliyey 16 gool, sidoo kalena ay hadhow iska garab ciyaari karaan Gabriel Jesus sidii Man City oo kale.
