Tababaraha xulka qaranka Morocco ee Walid Regragui ayaa amaanay ciyaartoydiisa oo taariikh weyn ka samaysay Koobka Adduunka oo ay noqdeen dalkii ugu horreeyey ee Afrikaan ah ee soo gaadha afar-dhamaadka, balse xalay uu Faransiisku reebay.
Finalka Koobka Adduunka ayay iskugu soo baxeen Faransiiska iyo Argentina, halka Morocco ay kaalinta saddexaad ku dagaallami doonaan Croatia oo ay Sabtida wada ciyaari doonaan.
Xulka lagu naanayso Atlas Lions ayaa waxay wareeggii siddeedda ku reebeen Portugal, ka Spain ay iyagana ku garaaceen wareeggii 16ka, sidoo kalena ay Belgium ku garaaceen wareeggii group-yada oo ay sabab u ahaayeen in ay sidaas kaga baxaan tartanka.
Labadii gool ee Theo Hernandez iyo Randal Kolo Muani ay xalay kaga dhaliyeen Al Bayt Stadium ayaa ahaa goolasha kaliya ee laga dhaliyey xulka Morocco balse waxa jiray gool uu isku qabtay oo si qaldan uu iskaga dhaliyey Nayef Aguerd, taas oo ka dhigan in laba gool oo kaliya laga dhaliyey lix ciyaarood oo ay dheeleen.
Tababare Regragui oo ciyaarta kaddib saxaafadda la hadlay ayaa la weydiiyey xulka ay taageeri doonaan finalka, waxaana uu ku jawaabay: “Anagu waxa aanu bixinay dedaalkayagii ugu badnaa, taas ayaana ahayd waxa ugu muhiimsan, laakiin waxa jiray dhawr dhaawac. Ciyaarta ka hor waxa aanu weynay Aguerd oo iskululayntii ku dhaawacmay, Saiss iyo Mazrauoui ayaa iyaguna dhaawacmay, balse taasi cudur-daar ma noqonayso.
“Qaladaad yaryar ayaanu samaynay, gaar ahaan qaybta hore, laakiin qaybtii dambe waanu fiicnayn inkasta oo uu goolka labaad na dilay.
“Ciyaartoydayada intooda badan taam ahaanshahoodu wuxuu ahaa 60-70%, haddana wax walba way hureen. Hadda waxa aanu finalka taageeri doonaa Faransiiska.”
