Xulka qaranka Argentina ayaa usoo gudbay wareegga 16ka Koobka Adduunka, kaddib markii ay Poland ku karbaasheen ciyaar uu Lionel Messi nasiibku ka xumaaday oo uu khasaariyey rikoodhe, sidoo kalena lumiyey fursado badan oo kale oo uu helay.
Argentina oo guul-darro ku bilaabatay koobka Adduunka ayaa dib ka dagaallantay oo labadii ciyaarood ee u dambeeyey guulo waaweyn soo hoysay, waxaanay sidaas kaalinta koowaad ugaga soo baxday Group-ka dhimashada ee C, waxaana sidoo kale soo gudbay Poland oo kaalinta labaad kaga soo baxday groupkan.
Laba gool oo ay kala dhaliyeen MacAllister iyo Julian Alvarez ayaa Argentina siiyey guushan sida weyn loogu dheg taagayay, hase yeeshee Lionel Messi oo ciyaartu diiddanayd ayaa isaguna khasaariyey rikoodhe loo dhigay qaybtii hore.
Argentina oo si xooggan ku bilaabatay ciyaarta ayaa waxay kubadda u diidday Poland oo kaliya ku ururtay difaacooda, isla markaana samaynayay qaladaad badan oo dhinaca baaska ah.
Acuna ayaa u dhowaaday inuu xulka Argentina hoggaanka u dhiibo, waxaana darbad xooggan oo uu ku toogtay goolka ay waxyar dhinaca ka martay birta iyadoo aanu goolhayuhuna hawaysanin inuu qabto kubaddaas.
Lionel Messi ayaa loo dhigay rikoodhe dhamaadka qaybta hore, waxaase si fudud uga badbaadiyey goolhaye Szczesny oo isku tuubay, waxaana uu goolhayaha Poland galay taariikhda Koobka Adduunka oo uu badbaadinta rikoodhahaas ku diiwaangashaday rikoodh taariikhi ah.
Szczesny ayaa noqday goolhayihii saddexaad ee tan iyo sannadkii 1966kii badbaadiya laba rikoodhe hal koob adduun gudihii, waxaana ka horreeyey Brad Friedel oo sannadkii 2002 laba rikoodhe badbaadiyey iyo Jan Tomaszewski oo sannadkii 1974kii laba rikoodhe badbaadiyey isaga oo u ciyaarayay xulka Poland.
Waqtigii nasashada ayuu tababare Lionel Scaloni u tilmaamay xiddigaha xulkiisa sida ugu habboon ee ay u jabinayaan darbiga difaaca ee Poland, waxaanay kubadda u maamuleen si xooggan iyaga oo isku-dhiib iyo tiki-taka ku dilay Poland.
Daqiiqaddii 46aad ee bilowga qaybta labaad ayay Argentina dhalisay goolka koowaad oo uu u saxeexay Mac Allister oo kubbad karoos ahayd oo uu ka helay Molina si fudud ugu leexiyey dhinaca goolka oo ka fogaa, waxaanay kubadda oo dhulka socotay gashay shabaqa iyadoo goolhaye Szczesny uu gaadhi kari waayey.
Lionel Messi ayaa garan waayey si uu yeelo markii kubbad uu ku toogtay goolka uu la waayey shabaqa, sidoo kalena Julian Alvarez ayaa shabaqa kaga dhuftay dhinaca kubbad uu dhinaca midig kala soo galay.
Argentina ayaa gool labaad dhalisay daqiiqaddii 68aad, waxaana u saxeexatay weeraryahanka da’da yar ee Julian Alvarez oo kubbad uu ka helay Fernandez si xarrago leh ugu hubsaday shabaqa, waxaanay ciyaartu noqotay 2-0.
Weeraryahanka Martinez ayaa kubbad uu ka helay goolka hortiisa waxa uu la seegay goolka iyadoo ku jarantay, waxaanay ciyaartu kusoo dhamaatay 2-0 ay guushu ku raacday Argentina.
Poland ayaa inkasta oo laga badiyey waxay usoo gudubtay wareegga 16ka, waxaana hadhay Mexico oo 2-1 kaga badisay Sucuudiga balse farqiga goolasha kaga hoosaysa Poland oo labaad kaga dhamaysatay hormada C.
