Daafaca dhexe ee kooxda Real Madrid ee David Alaba ayaa difaacay halyeeyga kubadda cagta ee Cristiano Ronaldo isagoo sheegay inuu abaal u hayo.
Bishii ugu dambaysay ayuu Cristiano ahaa mid badhtanka kaga jiray qas iyo eedaymo kaga imanaya dhinaca saxaafada gaar ahaan kaddib waraysigii muranka dhaliyay ee uu siiyay Piers Morgan.
Waraysigaas ayaa Ronaldo koox la’aan dhigay iyadoo laga fasaxay Manchester United oo uu dhaliilay waxaana u raacay intaas kaddib inuu waayay booskii asaasiga ahaa ee xulka Portugal wareegyadii dambe ee Koobka aduunka.
David Alaba oo la hadlay dhawaan muuqbaahiyaha Servus TV ayaa sheegay inuu Ronaldo abaal u hayo maadaama oo uu qaabeeyay jiilkooda kana xun yahay sida loola dhaqmayo.
“Waxa uu isagu (Ronaldo) sameeyay 15kii sano ee ugu dambeeyay, anigu shaqsiyan dhab ahaan abaal baan uga hayaa” ayuu yidhi daafaca Austrian-ka ahi.
“Isagu wuxuu naga caawiyay inuu qaabeeyo jiilkayaga, waxa uu gaadhay waa wax aan la rumaysan karin. Waa wax laga murugoodo oo laga xishoodo in lagu arko xaaladaas oo kale amaba aad akhrido waxyaabo sidaas ah oo isaga ku saabsan”.
Ronaldo ayaa haatan xor ah waxaana inta u badan lala xidhiidhinayaa kooxda ree Saudi Arabia ee Al Nassr oo ay wararka qaar sheegayaan inuu heshiis ilaa 2030 ah la gaadhay.
