Tababaraha kooxda Man United ee Erik Ten Hag ayaa markii ugu horreysay wax laga weydiiyay heshiiska uu ciyaaryahankiisii hore ee Cristiano Ronaldo kaga degay horyaalka Sucuudiga gaar ahaan kooxda Al Nassr.
Ronaldo ayaa bishii hore Man United si wadajir ah ula kansalay heshiiskii uu kula joogay isagoo filanayay inuu dalab ka heli doono koox Champions League ka ciyaaraysa.
Ugu dambayn Cristiano oo sidii uu filayay heli waayay ayaa heshiis laba sano iyo badh ah ugu wareegay Al Nassr oo uu mushahar waali ah kaga shaqo galay.
Kooxaha uu wakiilka Ronaldo ee Jorge Mendes awoodi waayay inuu saxeexa 37 sano jirkaas ku qanciyo ayay kamid yihiin Chelsea, Bayern Munich, Atletico Madrid, Napoli iyo AC Milan.
Ten Hag oo heshiiska Ronaldo ee Al Nassr la weydiiyay kaddib guushii shalay kooxdiisu kasoo gaadhay Wolves ayaa diiday inuu wax jawaab ah bixiyo isagoo sheegay inuusan wixii tagay ka hadlin.
“Anigu kama hadlo wixii tagay, aynu ka wada hadalno mustaqbalka, maanta talaabo wanaagsan ayaanu qaadnay” ayuu yidhi ETH.
“Waa inaanu kulamo guuleysano, waa markii ugu horreysay ee aanu afarta sarre soo galnay balse waxba lama micno aha sababtoo ah wado dheer ayaa hadhay, kulamo badan ayaa soo socda, waa inaanu u noolaano kulan ka kulan, waa inaanu guuleysano kulan kasta”.
