Lionel Messi ayaa diiday inuu soo xidho cutubtkiisa xulka qaranka Argentina kaddib markii ay ku guuleysteen Koobka Adduunka, waxaana uu ka noqday hadal uu hore u sheegay oo ahaa in ciyaarta ugu dambaysa ee uu qarankiisa u dheelayo ay tahay finalka Koobka Adduunka ee Qatar.
Axaddii markii ay Koobka Adduunka rikoodheyaasha kaga qaadeen Faransiiska ayaa uu Lionel Messi sheegay in uu usii ciyaari doono xulka dalkiisa, hse yeeshee mar kale ayuu haddana hadlay oo uu ugu bushaareeyey in afar sannadood kaddibna uu u hoggaamin doono xulkiisa Koobka Adduunka ee lagu qaban doono Maraykanka, Canada iyo Mexico.
Lionel Messi oo qandaraaskiisa PSG uu ku egyahay dhamaadka xilli ciyaareedkan ayaa la filayaa inuu heshiis cusub u saxeexo kooxdaas, sida uu sheegay Nasser Al-Khelaifi, waxaase sidoo kale jira warar sheegaya inuu tegi doono horyaalka Maraykanka ee MLS amaba uu dib ugu noqon doono Barcelona.
Kooxda uu tagaba, qorshaha Lionel Messi ayaa la sheegay in uu yahay inuu ciyaaro Koobka Adduunka ee afar sannadood kaddib, markaas oo ay da’diisu noqon doonto 39 jir.
Wargeyska Marka ee kasoo baxa Spain oo soo xiganaya ilo wareedyo ka agdhow Lionel Messi ayaa sheegay in uu 35 jirkani u ballan-qaaday ciyaartoyda xulkiisa in uu dheeli doono Koobka Adduunka ee 2026 oo uu waliba qaabka ugu fiican ku iman doono.
Paulino Granero ayaa isaguna wargeyska Marca u sheegay, in sida kaliya ee Messi uu ku ciyaari karayo ay tahay inuu sii joogo Paris Saint-Germain oo uu iska ilaaliyo inuu tago tartamada adag ee culayska sare ku keeni karaya, si aanay jidh ahaan usoo gaadhin dhaawacyo iyo daal caawiya da’diisa oo hoos u dhiga kubaddiisa.
