Daafaca midig ee xulka Morocco ee Achraf Hakimi oo kamida xiddigaha ugu cad cad dalkiisa wacdaraha ka dhigaya koobka aduunka sanadkan ayaa dib loo xusay hadal uu ku sharaxay sababta uu u diiday inuu xulka Spain metelo.
Xulka ree Africa ayaa booska koowaad kaga soo baxay Group ay kula jireen Belgium, Croatia iyo Canada kahor inta aysan xalay wareega 16-ka ku dilin Spain.
Mid kamida geesiyada rigoorayaashaas ayaa ahaa Hakimi kaas oo kubad fag ah (Panenka) ku dhaliyay goolka guusha.
Si kastaba, waxkasta sidan way ka duwanaan karayeen oo Hakimi wuxuu u ciyaari karayay xulka Spain maadaama oo uu dalkaas ku dhashay.
Hakimi ayaa kahor isla kulankan xalay sheegay inuu mar xerada da’yarta Spain tagay balse uu iska diiday xulkaas maadaama oo uusan ku dareemin dalkiisii oo kale.
“Haa, waxa jirtay wakhtiyo dhinaca da’yarta ah, waxa jiray xidhiidho. Waxaan tagay xulka qaranka Spanish-ka sidoo kale si aan iskuday u sameeyo” ayuu Hakimi Marca u sheegay kahor kulankii xalay.
“Waxaan dhawr maalmood joogay Las Rozas kaddib waxaan arkay inaysan meel igu haboon ahayn, maan dareemin sida dalkaygii oo kale”.
“Wax kale oo gaar ah ma ahayn balse waxaan dareemay sababtoo ah ma ahayn dareenkii aan dalkayga ku qabay kaas oo ah dhaqanka Carabta iyo inaan ahaado Moroccan. Waxaan doonayay inaan halkan joogo”
