Koobka Adduunka ayaa soo gaaray wareegyadii ugu xiisaha badnaa iyadoo ay isku soo arkeen sideed xul oo waa weyn.
Laakiin ciyaartoyda qaar ayay tahay inay digtoonaadaan ama inay halis geliyaan in semi-finalka ka soo daawadaan taribuunka.
Sababtoo ah haddii labo kaadh jaale ah uu ciyaaryahan qaato labo kulan oo kala duwan wuxuu ganaax ku seegayaa hal kulan.
Kaararka hurdiga ama jaalaha waxay noqonayaan waxba kama jiraan marka la gaaro semi-finalka. Kaliya ciyaartoyda semi-finalka casaanka qaata ayaa seegi doona finalka.
19 ciyaaryahan ayaa haatan halis ugu jira inay seegaan semi-finalka haddii ay kaadh hurdi ama jaale ah qaataan kulanka wareega sideed dhamaadka.
Waxaase cajiib ah in midkoodna uusan ku jirin xulka Ingariiska oo aan weli wax calaamad ah qaadanin.
Wadanka jaalaha ugu badan qaba waa Portugal oo u soo gudubtay wareega 8da markii ay 6-1 ku xasuuqeen Switzerland.
Bruno Fernandes, Danilo Pereira, Ruben Neves, Joao Felix, Ruben Dias ayaa dhamaantood hal jaale u jira inay seegaan semi-finalka.
Xulka ay la ciyaarayaan wareega 8da ee Morocco oo ka soo talaabsatay Spain ayaa iyagana waxaa jaale ka qaba seddex ciyaaryahan oo kala ah: Sofyan Amrabat, Abdelhamid Sabiri, iyo Romain Saiss.
Ingariiska cid halis uga jirta ma jirto laakiin France oo ay la ciyaarayaan wareega sideed dhamaadka waxaa jaale ka qaba Aurelien Tchouameni iyo Jules Kounde.
Croatia waxaa jaale ka qaba labada xiddig ee Luka Modric iyo Dejan Lovren halka xulka ay la ciyaarayaan ee Brazil ay jaale ka qabaan seddex xiddig oo kala ah Fred, Eder Militao, iyo Bruno Guimaraes.
Kulanka weyn ee Argentina iyo Netherlands, labada xul waxay qabaan ciyaartooy halis ugu jira inay seegaan semi-finalka.
Argentina waxaa jaale ka qaba Gonzalo Montiel iyo Marcos Acuna halka Netherlands ay jaale ka qabaan Nathan Ake iyo Matthijs de Ligt.
