Tababaraha Manchester United, Ruben Amorim, ayaa sheegay in ciyaartoyda kooxdiisa aysan wax cabasho ah ka keeni karin eedeynta uu u jeediyay milkiilaha kooxda ee Sir Jim Ratcliffe.
Ratcliffe ayaa wareysi uu toddobaadkan bixiyay ku sheegay in qaar ka mid ah ciyaartoyda United ay yihiin kuwo “si xad-dhaaf ah u mushaar qaata isla markaana aan tayo fiican lahayn.”
Amorim, oo ka hadlayay shir jaraa’id ka hor kulanka muhiimka ah ee Europa League ay la ciyaarayaan Real Sociedad, ayaa xusay in shaqada isaga iyo ciyaartoyda ay tahay inay beddelaan aragtida milkiilaha.
“Haddii aan daacad nahay, ha ahaado aniga ama ciyaartoyda, dhammaanteen waxaan xilli ciyaareedkan hoos u dhignay heerkii nalaga filayay,” ayuu yiri Amorim. “Waan beddeli karnaa arrintaas. Aniguba waan ogahay in dad badan ay yiraahdaan anigu ma ihi mid u qalma kooxda, laakiin natiijooyinka ayaa wax walba beddeli kara.”
Ratcliffe waxa uu sidoo kale carrabka ku adkeeyay in qaar ka mid ah xiddigaha kooxda, kuwaas oo la filayo in lacagtooda la sii bixiyo xagaaga, ay yihiin kuwo fashilmay. Liiskaas waxaa ka mid ah Jadon Sancho, Antony, Rasmus Højlund, André Onana, iyo xitaa Casemiro oo shan jeer ku guuleystay Champions League.
“Waxaan ka hadlayaa ciyaartoy sida Casemiro, oo wax walba ku guuleystay, waana ognahay inuu si ka wanaagsan u ciyaari karo,” ayuu raaciyay Amorim. “Ratcliffe wuxuu ahaa mid daacad ah. Waxa muhiimka ah ayaa ah inaan beddelno fikirka isaga iyo kan taageerayaasha.”
Manchester United waxa ay kulanka Real Sociedad gali doontaa iyadoo ay ka maqnaan doonaan daafacyada Harry Maguire iyo Leny Yoro. Mason Mount oo saddex bilood dhaawac ku maqnaa ayaa ku soo laabtay tababarka, balse kulankan ma ciyaari doono. Manuel Ugarte, oo labadii kulan ee ugu dambeysay maqnaa, ayaa laga yaabaa inuu ka soo muuqdo safka kooxda.
