Garabka Real Madrid, Vinicius Junior, ayaa diiday heshiis cusub oo ay u soo bandhigtay kooxda LaLiga, sida uu werinayo The Sun.
Vinicius, oo 24 jir ah, waxaa qandaraaskiisa haatan ee Santiago Bernabéu ku jira shuruud lagu burburin karo oo ku dhow £830 milyan.
Xiddiga reer Brazil ayaa noqday bartilmaameed ay doonayaan dhowr kooxood oo ka dhisan Saudi Pro League.
Vinicius wuxuu Real Madrid ka qaataa £12.5 milyan sanadkii, iyadoo heshiiskiisa haatan uu dhacayo sanadka 2027.
Si kastaba ha ahaatee, go’aankiisa uu ku diiday heshiis kordhinta bilowga ah ayaa shaki gelinaya mustaqbalkiisa Los Blancos.
Wararka ayaa sheegaya in wakiillada Vinicius iyo saraakiil ka socda Sucuudiga ay kulamo yeesheen bishii December, kaddib markii ay kooxahaas xiisaynayeen xagaagii hore.
Arrintan ayaa keentay in Real Madrid wadahadallo la furto ciyaaryahanka, si ay u xaqiijiyaan heshiis cusub oo muddo dheer ah.
Si kastaba ha ahaatee, Madrid diyaar uma ahan inay jebiso nidaamka mushaharka ee kooxda si ay heshiiskan u hirgeliso.
