Kooxaha Brighton iyo Borussia Dortmund ayaa hogaaminaya tartanka loogu jiro saxiixa khadka dhexe ee Liverpool, Harvey Elliott, oo waayay boos joogto ah.
Xiddiga 21-jirka ah ayaa si weyn uga soo muuqday xilli ciyaareedkii hore isagoo ka hoos shaqeynayay Jurgen Klopp, wuxuuna helay xilli ciyaareedkii ugu wax soo saarka badnaa tan iyo markii uu Fulham uga soo wareegay Reds lix sano ka hor.
Dhaawac halis ah oo canqowga ah ayaa hor istaagay inuu saameyn ku yeesho tababaraha cusub ee Liverpool, Arne Slot, inkastoo uu si tartiib ah uga soo muuqday tan iyo markii uu ka soo kabtay dhaawaca bishii Nofeembar.
Xaqiiqdii, xiddiga qaranka England ee da’da 21-jirka ah ayaa xilli ciyaareedkan ciyaaray kaliya sagaal kulan dhammaan tartamada, mana uusan ku bilaaban hal kulan oo Premier League ah.
Sida laga soo xigtay The Sun, Liverpool ayaa dooneysa inay ku hesho £35m illaa £40m ciyaaryahanka, kaasoo la filayo inuu si weyn u soo jiito kooxaha doonaya adeegiisa.
Markii uu ka hadlayay Elliott bishii Nofeembar, Slot wuxuu yiri:
“Waxaan mar walba rabnaa dhammaan ciyaartoydeena inay diyaar ahaadaan, waxayna inoo ahayd dharbaaxo weyn isaga iyo annagaba inuu muddo dheer dhaawac noqdo.
“Wuxuu maqnaa ilaa saddex bilood, hadda waxaan u baahan-nahay inaan waqti siino si uu ugu soo laabto heerkiisii caadiga ahaa.
“Waxaan dhawaan ka hadlay Ibou Konate oo aan kubadda cagta ciyaarin muddo saddex ilaa afar bilood ah, sababtoo ah kama uusan qeyb qaadan dhammaadka xilli ciyaareedka mana uusan ciyaarin Euro-ga.
“Taas awgeed, kulankiisii ugu horreeyay ee pre-season-ka ee Man United ma ahayn midkiisii ugu fiicnaa. Taasi waa wax caadi ah oo ku dhacda ciyaartoyda, waana inaan arrintaas tixgelino marka laga hadlayo Harvey.
“Haa, mar kale wuu nala tababaranayaa, laakiin taas waa ka duwan tahay inuu si degdeg ah ku soo laabto qaab ciyaareedkiisii ugu sarreeyay. Waa inaan siino waqti.”
