Xiddiga reer France ee Kylian Mbappe ayaa sheegay in maalmo kooban ay innaga xigaan waqtiga uu heshiiska u saxeexayo kooxdiisa cusub ee la filayo inay tahay Real Madrid, inkasta oo aanu isagu magacaabin.
Kylian Mbappe oo si xor ah uga tegaya PSG oo uu macasalaameeyey toddobaadkan horraantiisii, ayaa waxa uu sidoo kale ka hadlay kooxda uu taageerayo finalka Champions League ee Sabtida ay ku ballansan yihiin Real Madrid iyo Borussia Dortmund ee ka dhici doona garoonka Wembley Stadium.
Kylian Mbappe oo waraysi siiyey telefishanka Maraykanka ah ee CNN, ayaa waxa uu sheegay in maalmo kooban kaddib lagu dhawaaqi doono heshiiska kooxdiisa cusub, waxaanu yidhi: “Maalmo kooban ayaa innaga xigta, waqtiga aan u saxeexayo kooxdayda xigta.
“Waa in aynu samir yeelanno dhawr maalmood, kaddib waxay noqon doontaa rasmi. Aniga ayaaban sugi karayn waqtiga aan bilaabayo cutubka cusub.”
Dhinaca kale, Kylian Mbappe ayaa la weydiiyey kooxda uu taageerayo finalka Champions League ee Sabtida ee Real Madrid iyo Borussia Dortmund, waxaanu ku jawaabay: “Kaliya waan daawan doonaa, anigu waxa aan jecelahay kubadda cagta.”
