Goolhayaha kooxda kubadda cagta Manchester United ee Andre Onana ayaa laga tuuray shaxda koowaad ee xulka Cameroon ee kulanka guul ama geeri ee Gambia ee tartanka qaramada Afrika ee ka socda waddanka Ivory Coast.
Fabrice Ondoa oo ay ilmo-adeer yihiin Andre Onana ayaa uu tababare Song kusoo bilaabay ciyaartan oo ay u baahan yihiin guul qasab ah si ay ugu soo gudbaan wareegga xiga, haddii kalena waxa ay ka hadhi doonaan tartanka.
Andre Onana oo ka maqnaaday ciyaartii koowaad ee ay barbarraha 1-1 la galeen Guinea ayaa kusoobilowday ciyaartii xigtay ee Senegal oo ay guul-darro la kulmeen, iyadoo lagu eedeeyey in laga dhaliyey kubbado diciif ahaa oo uu badbaadin karayay.
Cameroon ayaa labadii ciyaarood ee ay dheeshay midna laga badiyey midka kalena barbarro gashay, waxaanay haysataa hal dhibic kaliya, halka Senegal ay kasoo baxday Group C oo ay sidoo kalena kaalinta labaad ku jirto Guinea oo ay caawa wada ciyaarayaan.
Haddii ay barbarro ku dhamaato ciyaarta Senegal iyo Guinea amaba ay Guinea badiso, waxa si toos ah u hadhi doonta Cameroon oo raaci doonta xulka mar horeba loo xaqiijiyey inay hadheen ee Gambia oo laga badiyey labadii ciyaaroodba.
