Andy Robertson ayaa iska diiday eedeymaha ku aaddan qaab ciyaareedkiisa xilli-ciyaareedkan ee Liverpool, wuxuuna caddeeyay in waqtigiisa Anfield uusan dhammaanin, inkastoo kooxda lala xiriirinayo ku dhawaad dhammaan daafacyada bidix ee adduunka.
Robertson ayaa ku dhibtooday inuu gaaro heerkii sare ee joogtada ahaa intii uu macallin Klopp joogay, gaar ahaan qeybtii hore ee xilli-ciyaareedkan, kaddib dhaawac dhanka seedaha canqowga ah oo carqaladeeyay diyaar-garowgiisii xagaaga.
Daafaca 31-jirka ah ayaa qirtay inuu dareemay in dad badani iska qoreen kaddib bandhigiisii liitay ee kulankii 2-2 ee ay Liverpool la gashay Arsenal bishii Oktoobar, markaasoo uu si khaldan ugu lug lahaa goolkii furitaanka ee Bukayo Saka. Robertson ayaa la beddelay wax yar kaddib saacad ciyaarta, wuxuuna kayd ku jiray kulamadii xigay ee ay Liverpool guulo ka gaartay Brighton & Hove Albion iyo Bayer Leverkusen.
Tan iyo markaas, wuxuu dib ugu soo noqday safka koowaad ee Arne Slot, wuxuuna noqday xubin joogto ah tan iyo bishii November.
“Waxaan u maleynayaa in la na la xiriiriyay ku dhawaad dhammaan daafacyada bidix ee adduunka,” ayuu Robertson ka sheegay shir jaraa’id Arbacadii, kahor kulanka Scotland ee isreeb-reebka UEFA Nations League ay la ciyaari doonaan Greece.
“Waa wax iska caadi ah marka aad u ciyaareyso mid ka mid ah naadiyada ugu waa weyn dunida. Marka aan dib u eego siddeed sano oo aan ahaa daafaca bidix ee Liverpool, waxaan dareemayaa sharaf weyn.
“Xilligaaga waa uu imanayaa, balse ma rumaysni in xilligeyga hadda yimid. Haddii la keeno qof kale, anigu waan tartami doonaa, mar walbana naftayda ayaan aamini doonaa.
“Hubaal, xilli-ciyaareedkan waxaa jiray dhowr waqti oo aanan si fiican u ciyaarin, balse wax badan ayaa si xad dhaaf ah loo buunbuuniyay.
“Waxaan u maleynayaa in heerkeyga ciyaareed uu wanaagsan yahay, xilli-ciyaareed wacan ayaan qaatay, laakiin aniga waxaa la igu yaqaannaa in aan ahaado mid joogto ah. Markaad dhowr qalad sameyso, dadku waa ay hadli doonaan.
“Taasina waa caalamka aan ku nool nahay, waa Premier League. Qof walba indhaha ayuu kugu hayaa, qof walbana wuxuu leeyahay aragti u gaar ah.
“Aniga wax walba sida ay yihiin ayaan u aqbalayaa, laakiin mar walba kalsooni ayaan ku qabaa kartidayda. Tan waxaan muujiyay intii aan ciyaarayay xirfaddayda oo dhan, gaar ahaan waqtigaygii Liverpool.”
Xilliga fasaxa caalamiga ah ayaa yimid kaddib labo toddobaad oo adag oo Liverpool laga reebay Champions League kaddib guuldarro ay kala kulmeen Paris Saint-Germain, iyo sidoo kale final-kii Carabao Cup, oo ay Newcastle United ka adkaatay. Si kastaba ha ahaatee, Robertson ayaa sheegay in kulammada xulkiisa ay ka caawiyeen inuu illoobo dhibaatooyinkii Liverpool.
