Kabtanka Manchester United Bruno Fernandes ayaa shaaca ka qaaday mid ka mid ah xiddigaha saameynta ugu weyn ku lug leh guulaha uu ka gaaray qaabka uu u tuuro rigooreyaasha.
Fernandes oo ka hadlayay wargeyska rasmiga ah ee Manchester United (Inside United) ayaa sheegay inuu la tashi la sameeyo saaxiibkiisii hore ee kooxda iyo xulka Portugal Cristiano Ronaldo marka uu rigoore laadayo. Si kastaba ha ahaatee, waxa uu tilmaamay in qof kale oo hore u saameeyay farsamadiisa uu yahay ciyaaryahankii hore ee Sampdoria, Fabio Quagliarella.
Xiddiga reer Portugal ayaa xilli ciyaareedkii 2016-17 kula soo ciyaaray Quagliarella kooxda Sampdoria, xilli ay ahayd waqti uu weeraryahanka Talyaaniga dib ugu laabanayay naadigaas si uu xirfadiisa ugu soo afjaro. Fernandes ayaa sheegay in inkastoo ay kala duwan yihiin qaabka ay rigooreyaasha u tuuraan, haddana uu ka bartay sida loo falanqeeyo dhaqdhaqaaqa goolhayayaasha si loo kordhiyo fursadda ay rigooreyaashu ku noqdaan goolal.
“Ciyaartoy badan oo rigooro tuura, waxay horay usii go’aansadaan dhinaca ay kubadda u tuuri doonaan, waxayna si xoog leh u la dhacaan goolhayaha. Weli wey dhalin karaan, balse anigu waxaan barasho ka helay Fabio Quagliarella markii aan Sampdoria joogay,” ayuu yiri Fernandes.
“Wuxuu had iyo jeer falanqeeyaa dhaqdhaqaaqa goolhayayaasha, wuxuu go’aamiyaa sida uu u tuuri doono rigooreyaasha, inkastoo uu leeyahay orod degdeg ah iyo laag awood badan. Waxa ugu muhiimsan ee aan ka bartay waa fahamka dhaq-dhaqaaqa goolhayaha si loo helo go’aan sax ah.”
Farsamadan uu ka dhaxlay Quagliarella ayaa ka dhigtay Bruno Fernandes mid ka mid ah rigoore-tuuryahannada ugu guulaha badan ee kubadda cagta, isagoo caan ku ah qaabkiisa gaarka ah ee rigooreyaasha.
