Bayern Munich ayaa wadahadalo la furtay Xabi Alonso si uu tababaraha Bayer Leverkusen u bedelo Thomas Tuchel dhamaadka xilli ciyaareedkan sida ay wararku sheegayaan.
Alonso ayaa la filayaa inuu noqdo tababare si weyn loo doonayo dhamaadka xilli ciyaareedkan, isagoo ku dhow inuu Bayer Leverkusen ku hogaamiyo horyaalka Bundesliga, waxaana xiiseynaya kooxihiisa hore ee Liverpool iyo Bayern Munich.
Bayern ayaa durba raadineysa tababare cusub ka dib markii la shaaciyay in Tuchel uu baxayo xagaaga, waxayna wadahadalo la bilaabeen Alonso sida ay shaacisay Sky Germany.
Bayern ayaa u aragta Alonso bedelka ugu haboon ee Tuchel ka dib markii kooxdooda ay 10 dhibcood ka dib martay Leverkusen kala sareynta horyaalka.
Leverkusen ayaa ku dhow inay soo gabagabeyso 12 sannadood oo ay Munich xoog ku heysatay horyaalka Jarmalka.
Alonso ayaa horay ugu soo ciyaaray Bayern Munich ka dib markii uu ka tagay Real Madrid, 42 jirkaan ayaana la sheegay inuu ku faraxsan yahay inuu ku biiro kooxda xagaaga.
Si kastaba, Munich ayaa u baahan inay bixiso lacag badan si ay u hesho Alonso madaama uu qandaraas kula jiro Bayer Leverkusen, waxayna u baahan yihiin inay qandaraaskiisa ku burburiyaan lacag u dhaxeysa 13 ilaa 21 milyan euro.
Qandaraaska Alonso ee Bayer Leverkusen waxa uu ku egyahay xagaaga 2026ka.
Warkaan ayaa waxa uu niyadjab weyn ku yahay Liverpool kuwaasoo sidoo kale u arkayay Alonso bedelka tababare Jurgen Klopp oo xagaaga ka tagaya kooxda.
