Wadahadallada ku saabsan heshiis cusub oo Declan Rice uu kula sii joogayo Arsenal ayaa billowday horaantii sanadkan, waxaana la xaqiijiyay in labada dhinac ay diyaar u yihiin in heshiis la gaaro.
Inkasta oo aan weli si rasmi ah loo shaacin kordhinta qandaraaskiisa, Mikel Arteta ayaa aaminsan in wadaxaajoodyadu ku dhammaan doonaan natiijo wanaagsan.
Markii la weydiiyay inuu filayo in heshiiska dhowaan la soo afjaro, Arteta wuxuu yiri:
“Haa. Dareenkaygu wuxuu yahay inuu halkan aad ugu faraxsan yahay. Wadahadal kasta oo aan la yeesho, wuxuu muujiyaa inuu doonayo inuu Arsenal sii joogo muddo dheer.
“Waa arrin waqti uun u baahan inta aan xal ka gaarayno.”
Rice ayaa xilli ciyaareedkii hore u ciyaaray xulka iyo Gunners 69 kulan. Wuxuu muddo badan la tacaalayay xanuun neerfaha ah oo ka jiray muruqa bowdada, wuxuuna xitaa xanuunka la ciyaaray Koobkii Adduunka ee xagaagii.
Inkasta oo uu xilli ciyaareed adag soo maray, Rice wuxuu tababarka diyaar-garowga Arsenal ku soo laabtay kaddib saddex toddobaad oo keliya oo nasasho ah.
Khadka dhexe ayuu ku soo bilowday dhammaan siddeeddii kulan ee Arsenal ay Premier League ciyaartay xilli ciyaareedkan. Waxaa sidoo kale laga filayaa door muhiim ah kulanka ay Axadda booqanayaan Liverpool.
Arteta ayaa intaas ku daray in Rice uu mar kale si joogto ah u soo bandhigayay ciyaaro wanaagsan, isagoo ammaanay dadaalkiisa iyo heerka joogteeyntiisa. Wuxuu sheegay in Arsenal ay u baahan tahay bandhig heer sare ah oo ka yimaada Rice iyo ciyaartoyda kale si ay Anfield ugala soo hoydaan saddexda dhibcood.
