Xiddiga khadka dhexe ee Real Madrid Federico Valverde ayaa sharaxay sababtii uusan u dabaaldegin ka dib goolkii uu ka dhaliyay Manchester City lugtii hore ee wareega sideed dhamaadka Champions League.
Valverde ayaa goolka barbaraha u dhaliyay Los Blancos dhamaadkii ciyaartii kulankii Santiago Bernabeu ee ku dhamaaday barbaro 3-3 ah.
Valverde ayaa yiri: “Waxaan xusuustaa wareysi la iga qaaday ciyaarta ka dib in la i weydiiyay sababta aan u qiimeynin goolkaas. Waxay u weydiiyeen sababta aanan ugu dabaaldegin goolka. Sababo aan sidaas u sameeyay ayaana jirtay.
“Ciyaartaas guuldarro ku dhamaanin laakiin sidaas oo kale ayay u muuqatay. Inagoo la ciyaareyna Man City inaan 3-3 ku dhameysano waxay u muuqatay sida guuldarro oo kale, waa sababta aan goolka u qiimeynin. Laakiin maanta waan ku faraxsanahay inaan dhaliyay goolkaas.”
Real Madrid ayaa lugtii labaad waxay barbaro 1-1 kula gashay Man City Etihad Stadium iyagoo rigoore ku garaacay kooxda Pep Guardiola una soo gudbay semi-finalka.
Waxay semi-finalkii sidoo kale ka soo talaabsadeen kooxda Jarmalka ee Bayern Munich iyagoo haatan finalka la ciyaaraya kooxda kale ee Jarmalka Borussia Dortmund.
Finalka ayaa la dheeli doonaa 1da bisha Juun oo ah maalinta Sabtida ee isbuuca soo socda iyadoo ciyaarta finalka ay ka dhici doonto garoonka Wembley.
