Halyeyga Arsenal ee Cesc Fabregas ayaa farriin qalbiga taabanaysa u diray ciyaartoyda Tottenham, waxaanu ka codsaday in ay ‘asxaan u sameeyaan’ oo ay ka qabtaan Manchester City oo ay caawa wada dheelayaan, si ay Arsenal ugu guuleysan karto horyaalka Premier League.
Arsenal ayaa hal dhibic ku hoggaamainaysa horyaalka Premier League iyadoo ay u hadhsan tahay hal ciyaar, laakiin waxay xafiiltamayaan Man City oo laba kulan baaqi u yihiin, kuwaas oo midkood ay caawa la dheelayso Tottenham.
Haddii Man City laga badiyo caawa, waxa ay farxad usoo hoyan doontaa Arsenal oo si buuxda hoggaanka ula wareegi doonto iyadoo Axadda ay ciyaarahooda ugu dambeeya la kala dheeli doonaan Everton iyo West Ham United.
Halyeygii Arsenal ee Cesc Fabregas oo ka hadlay telefishanka CBS ayaa yidhi: “Caawa waxa dhacaysa ciyaar weyn. Aynu eegno haddii ay Tottenham hal mar asxaan u samayn karto Arsenal. Xataa barbarraha ayaa natiijo cajiib ah u noqon karaya Arsenal.”
Cesc Fabregas oo hadalkiisa sii wata ayaa intaa ku daray: “Niyad-samaan ayaan ku qabaa in Arsenal ay ku guuleysanayso horyaalka, laakiin wax walba waxa ay ku xidhnaanayaan ciyaartan.”
